कोपरगाव, दि.२९.दिलीप गायकवाड
राष्ट्रीय पल्स पोलिओ मोहिमेअंतर्गत रविवारी (२८ जून) कोपरगाव नगरपरिषदेच्या आरोग्य विभागामार्फत पाच वर्षांखालील बालकांना पोलिओ प्रतिबंधक डोस देण्याचा उपक्रम राबविण्यात आला. भारतरत्न डॉ. बाबासाहेब आंबेडकर सार्वजनिक वाचनालयातील आरोग्य केंद्र क्रमांक १६ येथे सकाळी ७ ते ५ या वेळेत लसीकरणाची व्यवस्था करण्यात आली होती.
या केंद्रावर अंगणवाडी सेविका सौ. संगीता जोशी, परिचारिका तसेच कल्पना सूर्यवंशी पर्यवेक्षक आरोग्य कर्मचाऱ्यांनी बालकांना पल्स पोलिओचे डोस दिले. पालकांनीही आपल्या बालकांना डोस देण्यासाठी उत्स्फूर्त प्रतिसाद दिला.
मात्र, या महत्त्वाच्या आरोग्य उपक्रमाला स्थानिक नगरसेवक, नगराध्यक्ष, सत्ताधारी व विरोधी पक्षातील पदाधिकारी तसेच आरोग्य समितीच्या सदस्यांनी भेट न दिल्याने नागरिकांनी नाराजी व्यक्त केली. आरोग्य केंद्रावरील लसीकरणाची पाहणी करून नागरिकांशी संवाद साधणे अपेक्षित असताना बहुतांश लोकप्रतिनिधी अनुपस्थित राहिल्याची चर्चा होती.
राष्ट्रीय पल्स पोलिओ मोहिम ही बालकांना पोलिओमुक्त आणि निरोगी भविष्य देण्यासाठी महत्त्वाची मानली जाते. कोपरगावात हा उपक्रम सुरळीत पार पडला असला, तरी लोकप्रतिनिधींच्या अनुपस्थितीमुळे नागरिकांमध्ये उलटसुलट चर्चा रंगली.
