ठाणे, दि.२५.( अनिल काकुळते)
जिजाऊ शैक्षणिक व सामाजिक संस्थेचे अध्यक्ष निलेश भगवान सांबरे यांच्या मार्गदर्शनाखाली शनिवारी येऊर अभ्यासिका तसेच ठाणे स्टेशन पोलीस अकॅडमी आणि ठाणे स्टेशन कम्प्युटर क्लासेससह विविध अभ्यासिकांमधील विद्यार्थ्यांनी पारंपरिक वेशभूषेत आषाढी दिंडी उत्साहात साजरी केली.
जिजाऊ शैक्षणिक व सामाजिक संस्थेच्या माध्यमातून अनेक वर्षांपासून ठाण्यातील अभ्यासिकांमध्ये विविध धार्मिक व सांस्कृतिक सण उत्साहात साजरे केले जातात. यंदाही येऊर अभ्यासिका, ठाणे स्टेशन पोलीस अकॅडमी, ठाणे स्टेशन कम्प्युटर क्लासेस, डम्पिंग अभ्यासिका, लोकमान्य नगर अभ्यासिका, घोलाई नगर अभ्यासिका, दिघा अभ्यासिका, दिवा अभ्यासिका, मापानपाडा अभ्यासिका, भोलानगर अभ्यासिका आणि मुंब्रा अभ्यासिका येथून आषाढी दिंडीचे आयोजन करण्यात आले.
यावेळी विद्यार्थ्यांनी पारंपरिक वेशभूषेत सहभागी होत टाळ-मृदुंगाच्या गजरात “ज्ञानोबा-तुकाराम”, “जय हरी विठ्ठल” आणि “पांडुरंग हरी” अशा जयघोषांनी परिसर भक्तिमय केला. दिंडीमुळे वारकरी संप्रदायाची परंपरा, संतांचे विचार, संस्कार आणि सामाजिक ऐक्याचा संदेश विद्यार्थ्यांपर्यंत प्रभावीपणे पोहोचविण्यात आला.
जिजाऊ शैक्षणिक व सामाजिक संस्था, महाराष्ट्र यांच्या माध्यमातून विद्यार्थ्यांमध्ये संस्कार, शिस्त, सामाजिक बांधिलकी आणि भारतीय संस्कृतीचे जतन करण्यासाठी सातत्याने विविध सामाजिक, शैक्षणिक व सांस्कृतिक उपक्रम राबविले जात असून, आषाढी दिंडी हा त्याच परंपरेचा एक प्रेरणादायी भाग ठरला.
