मुंबईतील सहकार भवनाचे मुख्यमंत्री देवेंद्र फडणवीस यांच्या हस्ते भूमिपूजन
मुंबई : मंगेश म्हात्रे
अभ्युदयनगरच्या धर्तीवर प्रतीक्षानगरच्या पुनर्विकासाचा प्रस्ताव तयार करावा. येथील नागरिकांना एकत्रित घेऊन, प्रतीक्षा नगरलाही म्हाडाच्या माध्यमातून उत्तम प्रकारच्या मोठ्या घरात राहण्याचे स्वप्न पूर्ण करण्यासाठी तात्काळ आराखडा तयार करावा असे निर्देश मुख्यमंत्री देवेंद्र फडणवीस यांनी दिले.मुंबईमध्ये सहकार क्षेत्रासाठी स्वतंत्र व सर्वसमावेशक सुविधा असलेले ‘सहकार भवन’ उभारण्याची संकल्पना साकार होत असल्याचेही त्यांनी यावेळी सांगितले.
विक्रोळीतील कन्नमवार नगर, येथील मुंबई हाउसिंग फेडरेशन लि. संचालित सेवा, मार्गदर्शन व प्रशिक्षण केंद्राचे दूरदृष्टीप्रणालीद्वारे उद्घाटन व प्रतीक्षानगर, सायन येथे मुंबई जिल्हा मध्यवर्ती सहकारी बँकेच्या सहकार भवनाचे भूमिपूजन मुख्यमंत्री फडणवीस यांच्या हस्ते झाले.यावेळी सहकार मंत्री बाबासाहेब पाटील, माहिती व तंत्रज्ञान मंत्री तथा पालकमंत्री मुंबई उपनगर जिल्हा ॲड. आशिष शेलार, कौशल्य विकास मंत्री सह पालकमंत्री मुंबई उपनगर मंगल प्रभात लोढा, सहकार राज्यमंत्री डॉ पंकज भोयर, महापौर रितू तावडे, महाराष्ट्र गृहनिर्माण स्वयं-समूह पुनर्विकास प्राधिकरणाचे अध्यक्ष आमदार प्रवीण दरेकर, आमदार प्रसाद लाड, आमदार तमिल सेल्वन, आमदार अमित साटम, माजी खासदार राहुल शेवाळे, म्हाडा प्राधिकरण उपाध्यक्ष संजीव जयस्वाल, मुख्य अधिकारी म्हाडा मिलिंद बोरीकर, मुख्य अधिकारी झोपडपट्टी पुनर्वसन प्राधिकरण महेंद्र कल्याणकर, मुख्य अधिकारी इमारत दुरुस्ती व पुनर्रचना मंडळ मिलिंद शंभरकर यांच्यासह लोकप्रतिनिधी आणि विविध क्षेत्रातील पदाधिकारी उपस्थित होते.
मुंबईमध्ये सहकार क्षेत्रासाठी स्वतंत्र व सर्वसमावेशक सुविधा असलेले ‘सहकार भवन’
मुख्यमंत्री देवेंद्र फडणवीस यांनी सांगितले की, मुंबईमध्ये सहकार क्षेत्रासाठी स्वतंत्र व सर्वसमावेशक सुविधा असलेले ‘सहकार भवन’ उभारण्याची संकल्पना साकार होत असून, त्यातून प्रशिक्षण, मार्गदर्शन व प्रशासकीय सुविधा एकाच छताखाली उपलब्ध होणार आहेत. या भवनात आधुनिक कॉन्फरन्स हॉल, प्रशिक्षण कक्ष आणि विविध सुविधा उपलब्ध करून देण्यात येणार आहेत.राज्यात सहकार क्षेत्राला विशेष महत्त्व असून, विशेषतः सहकारी गृहनिर्माण संस्थांसाठी स्वतंत्र कायदेशीर तरतुदी करण्यात आल्या आहेत. गृहनिर्माण संस्थांचे कामकाज सुलभ व्हावे यासाठी शंभर टक्के डिजिटायझेशन, कार्यालयांचे विकेंद्रीकरण आणि विविध सुधारणा राबविण्यात आल्याचे मुख्यमंत्री फडणवीस यांनी सांगितले.
