ठाणे, दि.९ : अजय मगरे
वागळे इस्टेट पोलीस ठाण्याच्या गुन्हे प्रकटीकरण पथकाने घरफोड्यांच्या मालिका उकलत कुख्यात दिपक वैश्य (४०, रा. गोवंडी, मुंबई) या घरफोड्या आरोपीला अखेर गजाआड केले. तब्बल १५ पेक्षा अधिक घरफोड्यांमध्ये वाँटेड असलेल्या या आरोपीकडून सोन्या–चांदीचे दागिने आणि रोख रक्कम असा एकूण १ लाख ९२ हजार ५०० रुपयांचा ऐवज जप्त करण्यात आला आहे.
फिर्यादी सुरेखा खेडेकर यांच्या घराचा कडीकोयंडा तोडून अज्ञात चोरट्याने ८२ हजारांच्या दागिन्यांसह रोख रक्कम लंपास केल्याची घटना २४ नोव्हेंबरला घडली होती. २७ नोव्हेंबर रोजी गुन्हा दाखल होताच पोलिसांनी सीसीटीव्ही फुटेज आणि आरोपीच्या मोडस ऑपरेंडीच्या आधारे तपासाची दिशा निश्चित केली.
तपास सुरू असताना आरोपी तीन हात नाका परिसरात येणार असल्याची माहिती पोलिसांना मिळाली. त्यानुसार गुन्हे प्रकटीकरण पथकाने सापळा रचून ६ डिसेंबर रोजी पहाटे ३.४५ वाजता आरोपीला नाट्यमयरीत्या ताब्यात घेतले.
चौकशीत आरोपीने वागळे इस्टेट पोलीस ठाण्यातील गुन्हा क्रमांक ७०४/२०२५, ७०८/२०२५ आणि ७१०/२०२५ या तीन घरफोड्यांची कबुली दिली. तसेच श्रीनगर पोलीस ठाण्यातील दोन गुन्ह्यांमध्येही सहभाग असल्याचे उघड केले.
या यशस्वी कारवाईमध्ये परिमंडळ ५ चे पोलीस उप आयुक्त प्रशांत कदम यांच्या मार्गदर्शनाखाली वरिष्ठ पोलीस निरीक्षक शिवाजी गवारे, पोलीस निरीक्षक (गुन्हे) प्रविण सावंत, पोलीस निरीक्षक (प्रशासन) देवकर आणि गुन्हे प्रकटीकरण पथकातील संतोष मगरे , छोटू दाभाडे , नितीन चव्हाण ,संदीप पाटील , भूषण गावडे आदी अधिकारी–कर्मचाऱ्यांनी मोलाची भूमिका बजावली.
