बेवारस जिवंत व मृत वासरांची विल्हेवाट शाळेजवळ; विद्यार्थ्यांचे आरोग्य धोक्यात
कोपरगाव,दि.२६.दिलीप गायकवाड
कोपरगाव तालुक्यातील सांगवी भुसार-धामोरी मार्गावर अमानुषतेचा कळस गाठणारा प्रकार उघडकीस आला आहे. गोदावरी कृषी उत्पन्न बाजार समिती परिसरात तसेच बनकर वस्ती शाळेजवळ जिवंत व मृत गायीची वासरे बेवारस अवस्थेत सोडून दिली जात असल्याने संताप व्यक्त केला जात आहे.
मृत वासरे शाळा परिसरालगत रस्त्याकाठी टाकली जात असल्यामुळे विद्यार्थ्यांना तीव्र दुर्गंधीचा सामना करावा लागत आहे. आरोग्याला घातक ठरणाऱ्या या प्रकारामुळे पालकवर्गातही भीतीचे वातावरण निर्माण झाले आहे. दुसरीकडे, जिवंत वासरे बेवारस सोडल्याने परिसरात बिबट्याच्या वावरात वाढ झाल्याची नागरिकांची तक्रार आहे.
त्यामुळे महिलांवर, नागरिकांवर तसेच शाळकरी मुलांवर हल्ल्याचा धोका वाढल्याची भीती व्यक्त केली जात आहे.
सांगवी भुसार येथील रहिवासी व गौप्रेमी सामाजिक कार्यकर्ते आमोल मालवे यांनी या प्रकाराचा तीव्र निषेध करत प्रशासन व गौ-रक्षक संघटनांना तातडीने कारवाईचे आवाहन केले आहे. “मृत वासरांची योग्य विल्हेवाट लावा, जिवंत वासरे बेवारस सोडू नका. अशी अमानुष हेळसांड थांबवा. हे पाप करू नका,” अशा शब्दांत त्यांनी जनावरांचे पालन करणाऱ्यांना फटकारले आहे.
प्रशासनाने तात्काळ लक्ष घालून दोषींवर कारवाई करावी, अन्यथा नागरिकांच्या रोषाला सामोरे जावे लागेल, असा इशाराही स्थानिकांकडून देण्यात येत आहे.
