महापरिनिर्वाण दिनी एमएमआरडीएकडून प्रगती अहवाल जाहीर
मुंबई, दि.६ : मंगेश म्हात्रे
समस्त देशवासीयांना उत्सकुता असलेल्या मुंबईतील इंदू मिल परिसरात उभारल्या जाणाऱ्या डॉ. बाबासाहेब आंबेडकर आंतरराष्ट्रीय स्मारकाच्या कामाची अद्ययावत माहिती एमएमआरडीएकडून जाहीर करण्यात आली आहे. डॉ बाबासाहेब आंबेडकर आंतरराष्ट्रीय स्मारकाचे प्रणेते चंद्रकांत भंडारे यांनी केलेल्या लेखी निवेदनाला दिलेल्या उत्तरात प्राधिकरणाने स्मारकाची एकूण भौतिक प्रगती ५४ टक्के झाल्याची माहिती स्पष्ट केली आहे.
एमएमआरडीएने दिलेल्या माहितीनुसार, स्मारकासाठीची सहायक इमारतींची स्ट्रक्चरल कामे पूर्णपणे १०० टक्के पूर्ण झाली असून सध्या इंटीरियर फिनिशिंगची कामे सुरू आहेत. मुख्य स्मारक इमारतीचे संरचनात्मक काम जलद गतीने सुरू असून पुतळ्याच्या पायथ्याचे बांधकाम अंतिम टप्प्यात आहे.
डॉ. आंबेडकरांच्या विश्वविख्यात पुतळ्यासाठी लागणाऱ्या ६,००० टन स्ट्रक्चरल स्टीलपैकी १,४७८ टन स्टील तयार झाले आहे. त्यापैकी ६४० टन साईटवर प्राप्त झाले असून काम सुरू आहे.
२३० फूट उंचीचा पुतळा – मॉडेल पूर्ण
प्राधिकरणाने सांगितले की पुतळ्याचे १:१ थर्माकोल मॉडेल २३० फूट उंचीपर्यंत पूर्ण झाले आहे. पुतळ्यासाठी लागणाऱ्या ८५० टन कांस्य धातूपैकी १०७ टन धातू साईटवर प्राप्त झाला असून ५५ टन पॅनल कास्टिंग पूर्ण झाले आहे.
महापरिनिर्वाण दिनीच हा अहवाल जाहीर केल्याने स्मारकाच्या कामाबाबतची अधिकृत माहिती स्पष्ट झाली आहे. पुढील काळात कामाचा वेग वाढवून प्रकल्प वेळेत पूर्ण करण्यावर भर देण्यात येणार असल्याचे एमएमआरडीए प्राधिकरणाने नमूद केले आहे.
