महाराष्ट्र–बाडेन वुटेमबर्ग राज्यांदरम्यान संयुक्त करार वैद्यकीय शिक्षण राज्यमंत्री माधुरी मिसाळ यांची माहिती
मुंबई, दि. ७ : मंगेश म्हात्रे
महाराष्ट्रातील नर्सिंग विद्यार्थ्यांसाठी जर्मनीच्या बाडेन–वुटेमबर्ग राज्यात प्रशिक्षण आणि करिअरच्या नवीन दालने खुली करणारा ऐतिहासिक संयुक्त करार झाला आहे. सह्याद्री अतिथीगृह येथे वैद्यकीय शिक्षण राज्यमंत्री माधुरी मिसाळ आणि बाडेन–वुटेमबर्ग राज्याचे मंत्री मॅनफ्रेड लुखा यांच्या उपस्थितीत हा करार करण्यात आला.
यावेळी वैद्यकीय शिक्षण विभागाचे सचिव धीरजकुमार, आयुक्त डॉ. अनिल भंडारी, संचालक डॉ. अजय चंदनवाले, सहसचिव डॉ. सुवर्णा खरात तसेच बाडेन–वुटेमबर्ग राज्यातील सामाजिक व्यवहार, आरोग्य आणि एकात्मता मंत्रालयाचे वरिष्ठ प्रतिनिधी उपस्थित होते.
राज्यमंत्री मिसाळ म्हणाल्या, “या करारामुळे महाराष्ट्रातील नर्सिंग विद्यार्थ्यांना जर्मनीत प्रगत प्रशिक्षण, भाषा शिक्षण, कौशल्य विकास आणि रोजगाराच्या सुवर्णसंधी उपलब्ध होणार आहेत. प्रमाणपत्र मान्यतेची प्रक्रिया सुलभ करण्यासोबतच नोकरी स्वीकारणाऱ्या भारतीय नर्सेसच्या सन्मान व संरक्षणासाठी विशेष कार्यक्रम राबवले जाणार आहेत.” विद्यार्थी–प्राध्यापक आदानप्रदान, संयुक्त प्रशिक्षण, अभ्यासदौरे आणि संशोधन उपक्रमांद्वारे नर्सिंग शिक्षणाची गुणवत्ता आंतरराष्ट्रीय पातळीवर नेण्याचा उद्देश असल्याचे त्यांनी सांगितले.
बाडेन–वुटेमबर्गचे मंत्री मॅनफ्रेड लुखा यांनी सांगितले, “आरोग्यसेवा क्षेत्रातील कौशल्याधारित मनुष्यबळ तयार करणे, संशोधनाला चालना देणे आणि परदेशात रोजगार संधी निर्माण करणे हा या सहकार्याचा केंद्रबिंदू आहे. या भागीदारीमुळे दोन्ही राज्यांतील आरोग्यसेवा क्षमता अधिक सक्षम होणार आहे.”
बाडेन-वुटेमबर्ग राज्याच्या प्रतिनिधी मंडळाने ३० नोव्हेंबर ते ६ डिसेंबर २०२५ या कालावधीत महाराष्ट्र राज्याचा दौरा केला होता. नर्सिंग क्षेत्रातील सहकार्य वाढवणे, प्रशिक्षणाच्या संधी उपलब्ध करून देणे व कौशल्य विकासासाठी नवीन मार्ग उभारणे हा या भेटीचा प्रमुख उद्देश होता.
या उपक्रमामुळे महाराष्ट्र व बाडेन-वुटेमबर्ग राज्यांमधील आरोग्यसेवा व नर्सिंग क्षेत्रातील आंतरराष्ट्रीय भागीदारी अधिक बळकट होणार आहे.
