भाजपची राज्यसभेची दुसरी यादी जाहीर; महाराष्ट्रातून रामदास आठवले, विनोद तावडे, माया इवनाते आणि रामराव वडुकते यांना संधी
मुंबई | प्रतिनिधी
राज्यसभेच्या निवडणुकांसाठी भारतीय जनता पक्षाने उमेदवारांची दुसरी यादी जाहीर केली असून महाराष्ट्रातून चार जणांना संधी देण्यात आली आहे. केंद्रीय मंत्री रामदास आठवले, भाजपचे नेते विनोद तावडे, माया इवनाते आणि रामराव वडुकते यांना उमेदवारी देण्यात आल्याची घोषणा करण्यात आली आहे.
महाराष्ट्रात राज्यसभेच्या एकूण ७ जागांसाठी निवडणूक होणार आहे. यापैकी ४ जागा भाजपच्या वाट्याला आल्या आहेत. या चारपैकी एक जागा मित्रपक्षाला देण्यात आली असून रिपब्लिकन पक्षाचे नेते रामदास आठवले यांना पुन्हा एकदा संधी देण्यात आली आहे.
देशभरात राज्यसभेतील ३७ जागा रिक्त होणार असल्याने त्यासाठी निवडणूक प्रक्रिया जाहीर करण्यात आली आहे. राज्यसभेसाठी उमेदवारी अर्ज दाखल करण्याची अंतिम मुदत ५ मार्च असून अर्ज मागे घेण्याचा शेवटचा दिवस ७ मार्च आहे.
रिक्त होणाऱ्या ३७ जागांपैकी १२ जागा एनडीएकडे तर २५ जागांवर विरोधी पक्षांचे खासदार सध्या कार्यरत आहेत. महाराष्ट्रातील ७ जागा रिक्त होत असून त्यासाठी ही निवडणूक होत आहे.
दरम्यान, भाजपने इतर राज्यांतील उमेदवारांचीही घोषणा केली आहे. बिहारमधून नितीन नवीन आणि शिवेश राम, आसाममधून तेरश गोवाला आणि जोगेन मोहन, छत्तीसगडमधून लक्ष्मी वर्मा, हरियाणातून संजय भाटिया, ओडिशातून मोहनलाल सामल आणि सुजीत कुमार, तर पश्चिम बंगालमधून राहुल सिन्हा यांना उमेदवारी देण्यात आली आहे.
