तुषार दामगुडेंवर कारवाईची मागणी
पुण्यात काँग्रेस पक्षाचे प्रवक्ते हनुमंत पवार यांच्यावर मारहाण झाल्याची घटना समोर आली आहे. मित्र मंडळ चौक परिसरातील दैनिक पुढारी कार्यालयाजवळ हा प्रकार घडल्याची माहिती मिळत असून, संपूर्ण घटना सीसीटीव्ही कॅमेऱ्यात कैद झाल्याचे सांगितले जात आहे.
काँग्रेसच्या स्थानिक पदाधिकाऱ्यांच्या म्हणण्यानुसार, पवार यांना काही व्यक्तींनी अडवून धमकावत मारहाण केल्याचा आरोप करण्यात आला आहे. तसेच, एका व्यक्तीने बंदुकीचा धाक दाखवल्याचाही आरोप करण्यात आला असून या घटनेचा काँग्रेसकडून तीव्र निषेध व्यक्त करण्यात आला आहे.
काँग्रेसचे प्रदेशाध्यक्ष हर्षवर्धन सकपाळ यांनी या प्रकरणाचा निषेध करत राज्य सरकारवर निशाणा साधला. “महाराष्ट्रात गुंड प्रवृत्तीला खतपाणी घालण्याचे काम सुरू आहे. राज्याचे गृहमंत्री देवेंद्र फडणवीस यांनी अशा प्रवृत्तीला अभय देऊ नये,” असे ते म्हणाले.
सकपाळ यांनी पुढे सांगितले की, हल्ल्याप्रकरणी आरोपी तुषार दामगुडे याला तातडीने अटक करून कठोर कारवाई करावी. “कायद्याचा धाक राहिला पाहिजे, अन्यथा राज्यातील कायदा-सुव्यवस्थेवर गंभीर प्रश्नचिन्ह निर्माण होईल,” असा इशाराही त्यांनी दिला.
दरम्यान, या प्रकरणी संबंधित व्यक्तींवर तातडीने गुन्हा दाखल करून कारवाई करण्याची मागणी काँग्रेसकडून करण्यात आली आहे. घटनेनंतर परिसरात काही काळ तणावाचे वातावरण निर्माण झाले होते.
