मुंबई : मंगेश म्हात्रे
सायन-बांद्रा लिंक रोड परिसरात सार्वजनिक ठिकाणी उभे राहून अश्लील हावभाव व शब्दप्रयोग करून नागरिकांना त्रास देणाऱ्या तृतीयपंथीयांवर धारावी पोलिसांनी कारवाई केली. या प्रकरणी दोन तृतीयपंथीयाला ताब्यात घेऊन त्याच्याविरोधात गुन्हा दाखल करण्यात आला आहे.
पोलिसांनी दिलेल्या माहितीनुसार, २१ मे रोजी सायंकाळी साडेसातच्या सुमारास सायन-बांद्रा लिंक रोडवरील टी-जंक्शन ते कलानगरकडे जाणाऱ्या मार्गावर काही तृतीयपंथीय महिला उभ्या राहून येणाऱ्या-जाणाऱ्या नागरिकांना अश्लील हावभाव करत असल्याची माहिती धारावी पोलिसांना मिळाली होती. त्यानुसार पोलिसांनी घटनास्थळी धाव घेत पंचांच्या उपस्थितीत कारवाई केली.
या कारवाईदरम्यान साबू आलम ऊर्फ खुशी (वय ३१) आणि तौदिक शेख उर्फ सुरभी ( वय २३) हिला ताब्यात घेण्यात आले. चौकशीदरम्यान संबंधित व्यक्ती रस्त्यावर उभे राहून ग्राहकांना आकर्षित करण्यासाठी हातवारे व इशारे करत असल्याचे समोर आल्याचे पोलिसांनी सांगितले.
या प्रकरणी धारावी पोलिस ठाण्यात भारतीय न्याय संहिता कलम २९६, अनैतिक व्यापार प्रतिबंधक कायद्यातील कलम ८ (ब) तसेच मुंबई पोलीस कायद्यातील कलम ११० आणि ११७ अंतर्गत गुन्हा दाखल करण्यात आला असून पुढील तपास सुरू आहे.
