म्हाडाच्या कोकण मंडळाचा मोठा निर्णय:
ठाणे जिल्ह्यातील घरांच्या किंमतीत लाखोंची कपात
मुंबई,२४ ( प्रतिनिधी )
म्हाडाच्या कोकण गृहनिर्माण व क्षेत्र विकास मंडळाने प्रधानमंत्री आवास योजना (शहरी) अंतर्गत ठाणे जिल्ह्यातील शिरढोण आणि खोणी येथील ६,२४८ सदनिकांच्या विक्री किंमतीत मोठी कपात केली आहे. ‘प्रथम येणाऱ्यास प्रथम प्राधान्य’ या योजनेअंतर्गत हे निर्णय घेण्यात आले असून, त्यामुळे अत्यल्प उत्पन्न गटातील पात्र लाभार्थ्यांना मोठा आर्थिक दिलासा मिळणार आहे.
कोकण मंडळाच्या मुख्य अधिकारी श्रीमती रेवती गायकर यांनी दिलेल्या माहितीनुसार, मौजे शिरढोण येथील ५,२३६ सदनिकांच्या किंमतीत प्रती सदनिका १ लाख ४३ हजार ४०४ रुपयांची कपात करण्यात आली आहे. यामुळे या सदनिकेची सुधारित किंमत आता १९ लाख २८ हजार ७४२ रुपये इतकी राहील.
तसेच, मौजे खोणी येथील १,०१२ सदनिकांच्या विक्री किंमतीत प्रती सदनिका १ लाख १ हजार ८०० रुपयांची कपात करण्यात आली असून, सुधारित किंमत १९ लाख ११ हजार ७०० रुपये इतकी असेल.
म्हाडाचे उपाध्यक्ष संजीव जयस्वाल यांनी या प्रस्तावास मान्यता दिली आहे.
या निर्णयामुळे परवडणाऱ्या दरात घर मिळविण्याचे स्वप्न पाहणाऱ्या नागरिकांना मोठा दिलासा मिळणार आहे, असे म्हाडाच्या जनसंपर्क विभागातर्फे कळविण्यात आले आहे.
