अन्न व औषध प्रशासनाची मोठी कारवाई; पतंजलीशी संबंधित औषधांचा साठा जप्त
अन्न व औषध प्रशासनाचे (एफडीए) नवे आयुक्त तुकाराम मुंढे यांनी पदभार स्वीकारताच विभागाच्या हालचालींना वेग आला आहे. नागपूर जिल्ह्यातील येरला येथील एका पॅकिंग युनिटवर एफडीएच्या अधिकाऱ्यांनी अचानक धाड टाकली आणि या कारवाईनंतर औषध क्षेत्रात एकच खळबळ उडाली.
छाप्यामध्ये नेमकं काय सापडलं, याबाबत सुरुवातीला गुप्तता पाळण्यात आली होती. मात्र तपास जसजसा पुढे सरकत गेला, तसतशी धक्कादायक माहिती समोर येऊ लागली. पतंजली समूहाशी संबंधित दिव्य फार्मसीने तयार केलेल्या औषधांचा मोठा साठा अधिकाऱ्यांच्या हाती लागल्याचे समोर आले आहे. या साठ्याबाबत अनेक प्रश्न उपस्थित होत असून, संबंधित कागदपत्रे आणि उत्पादन प्रक्रियेचीही कसून चौकशी सुरू करण्यात आली आहे.
मुंढे यांच्या नेतृत्वाखालील ही पहिली मोठी कारवाई मानली जात असल्याने प्रशासकीय वर्तुळातही तिची जोरदार चर्चा सुरू आहे. या छाप्यामागे नेमकं कारण काय? जप्त करण्यात आलेल्या औषधांमध्ये कोणत्या प्रकारच्या उत्पादनांचा समावेश आहे? आणि या प्रकरणात आणखी कोणाची नावे समोर येणार? याबाबत उत्सुकता वाढली आहे.
दरम्यान, या कारवाईनंतर अन्न व औषध प्रशासन आता राज्यभरातील संशयित युनिट्सवरही लक्ष ठेवून असल्याची चर्चा रंगली आहे. त्यामुळे मुंढे यांच्या पुढील कारवाईकडे सर्वांचे लक्ष लागले आहे.
