मुंबई -मंगेश म्हात्रे
मुंबईतील सायन परिसरातील प्रतीक्षा नगर बेस्ट डेपोमध्ये रविवारी (24 मे) मध्यरात्रीच्या सुमारास भीषण आग लागल्याने एकच खळबळ उडाली. रात्री साधारण 11.30 वाजताच्या दरम्यान डेपोमध्ये उभी असलेल्या एका खाजगी बसमधून अचानक धूर निघू लागला आणि काही क्षणांतच आगीने उग्र रूप धारण केले.
डेपोमध्ये एकामागोमाग एक बस उभ्या असल्याने काही काळासाठी मोठा अनर्थ घडण्याची भीती निर्माण झाली होती. आग लागलेल्या बसच्या अगदी शेजारी सहा बस पार्किंगमध्ये उभ्या होत्या. आगीच्या ज्वाळा वेगाने पसरत असल्याचे पाहून डेपोतील कर्मचाऱ्यांनी प्रसंगावधान राखत तातडीने धाव घेतली आणि जीव धोक्यात घालून त्या सहा बस सुरक्षित स्थळी हलवल्या.
कर्मचाऱ्यांच्या या धाडसी आणि तत्पर कृतीमुळे मोठी दुर्घटना टळली. अन्यथा काही मिनिटांतच संपूर्ण डेपो आगीच्या विळख्यात सापडला असता आणि कोट्यवधी रुपयांचे नुकसान झाले असते, अशी चर्चा घटनास्थळी सुरू होती.
दरम्यान, आग लागल्याची माहिती मिळताच अग्निशमन दलाच्या गाड्या घटनास्थळी दाखल झाल्या. जवानांनी शर्थीचे प्रयत्न करत आग आटोक्यात आणली. मात्र तोपर्यंत संबंधित बस पूर्णपणे जळून खाक झाली होती.
सुदैवाने या घटनेत कोणतीही जीवितहानी झाली नाही. मात्र या घटनेनंतर डेपोतील सुरक्षाव्यवस्था, खाजगी बसांची देखभाल आणि अग्निसुरक्षा उपाययोजनांबाबत गंभीर प्रश्न उपस्थित केले जात आहेत.
