ठाणे, दि. ३० : अजय मगरे
उद्योजकता विकास चळवळीत आपले संपूर्ण आयुष्य वाहिलेल्या महाराष्ट्र उद्योजकता विकास केंद्राचे (एमसीईडी) पुणे विभागीय अधिकारी डॉ. अभिराम डबीर यांनी ३० नोव्हेंबर २०२५ रोजी निहित वयोमानानुसार सन्मानपूर्वक निवृत्ती घेतली. तब्बल ३२ वर्षे उद्योजकीय प्रेरक, प्रशिक्षक आणि मार्गदर्शक म्हणून त्यांनी बजावलेल्या कार्याचा आज विविध स्तरावरून गौरव होत आहे.
अमरावतीचे मूळ रहिवासी असलेले डॉ. डबीर यांनी पुण्यातील सेवाकाळात महाराष्ट्रातील तळागाळापर्यंत उद्योजकता आणि कौशल्य विकासाची ज्योत पोहोचवली. अत्यंत नाविन्यपूर्ण प्रशिक्षण तंत्र, उद्योजक निर्मितीला प्राधान्य आणि शेकडो प्रशिक्षण उपक्रमांच्या माध्यमातून त्यांनी हजारो तरुणांना स्वावलंबनाकडे नेण्याचे काम केले.
त्यांच्या उल्लेखनीय कार्याचा गौरव नेहरू युवा केंद्र (एमसीईडी) आणि भारतीय उद्यमिता विकास संस्था (ईडीआयआय) यांच्यातर्फे अनुक्रमे जिल्हा, राज्य आणि राष्ट्रीय पातळीवरील सर्वोत्तम उद्योजकता प्रेरक प्रशिक्षक पुरस्कारांनी करण्यात आला आहे.
उच्च शैक्षणिक पात्रतेसह सखोल अभ्यासाची जोड असलेल्या डॉ. डबीर यांनी उद्योजकता, मराठी उद्योजकीय साहित्य आणि कौशल्य विकासावर महत्त्वपूर्ण संशोधन केले आहे. राज्य आणि राष्ट्रीय पातळीवर सादर केलेले त्यांच्या संशोधन लेखांनी या क्षेत्राला दिशादर्शन केले. ‘उद्योजक’ या एमसीईडी प्रकाशित मासिकाचे विभागप्रमुख म्हणून मागील ३० वर्षांत त्यांनी केलेले चिकित्सक व अभ्यासपूर्ण लेखन हे त्यांच्या आर्थिक–सामाजिक व्यासंगाचे प्रतीक मानले जाते.
उद्योजकतेचा प्रसार हा आयुष्यभराचा ध्यास मानून काम केलेल्या डॉ. अभिराम डबीर यांची निवृत्ती ही कार्याचा अंत नसून नवे पर्व असल्याचे सहकारी, विद्यार्थी आणि हितचिंतक मानतात. राज्यभरातील उद्योजक, सहकारी, प्रशिक्षणार्थी आणि शुभेच्छुकांकडून त्यांना भविष्यातील कार्यासाठी मनःपूर्वक शुभेच्छा मिळत आहेत.
