परवडणाऱ्या घरांच्या वाटचालीला चालना; २३ डिसेंबरपर्यंत अर्ज नोंदणी
मुंबई, दि.१ : मंगेश म्हात्रे
नाशिककरांसाठी परवडणाऱ्या घरांचा मार्ग आणखी प्रशस्त करत म्हाडा नाशिक मंडळातर्फे आगाऊ अंशदान तत्वावर ४०२ सदनिकांच्या सोडतीची ऑनलाईन प्रक्रिया आज सुरू झाली. ‘गो लाईव्ह’ कार्यक्रमात म्हाडाचे उपाध्यक्ष संजीव जयस्वाल यांच्या हस्ते अर्ज नोंदणी व स्वीकृतीचा शुभारंभ करण्यात आला. वांद्रे–पूर्व येथील म्हाडा मुख्यालयात हा कार्यक्रम पार पडला.
यावेळी बोलताना जयस्वाल म्हणाले, “नाशिक मंडळाने २०२५ मध्ये आतापर्यंत तीन सोडतींद्वारे ८४६ घरे उपलब्ध करून दिली आहेत. ही चौथी सोडत असून परवडणाऱ्या घरांची उपलब्धता वाढवण्याचा मंडळाचा प्रयत्न निश्चितच कौतुकास्पद आहे.”
नाशिक शहरातील चुंचाळे, पाथर्डी, मखमलाबाद, आडगाव आणि सातपूर या शिवारातील विविध गृहनिर्माण प्रकल्पांमध्ये या ४०२ सदनिकांचा समावेश आहे.
अल्प उत्पन्न गटासाठी (EWS):
चुंचाळे – १३८,पाथर्डी – ३०,
मखमलाबाद – ४८,आडगाव – ७७,एकूण : २९३ सदनिका
मध्यम उत्पन्न गटासाठी (MIG):
सातपूर – ४०,पाथर्डी – ३५,
आडगाव – ३४ एकूण : १०९ सदनिका.
घरांच्या किंमती ₹१४,९४,०२३ ते ₹३६,७५,०२३ दरम्यान आहेत. सोडतीत यशस्वी होणाऱ्या अर्जदारांनी घराची रक्कम ५ टप्प्यांत भरायची आहे.
अर्ज कसा करावा? इच्छुक अर्जदारांनी https://housing.mhada.gov.in किंवा https://mhada.gov.in या संकेतस्थळांवर ऑनलाईन अर्ज करावा.
अर्ज नोंदणीची अंतिम तारीख : २३ डिसेंबर २०२५, रात्री ११.५९
ऑनलाइन अनामत रक्कम भरण्याची तीच अंतिम मुदत
२४ डिसेंबर : बँकेच्या वेळेत RTGS/NEFT द्वारे रक्कम स्वीकारली जाणार
३० डिसेंबर रोजी दुपारी ३ वाजता प्राथमिक यादी जाहीर केली जाईल.
३० डिसेंबर सायं. ६ ते २ जानेवारी २०२६ सायं. ६ या काळात ऑनलाइन आक्षेप–दावे दाखल करता येतील.
६ जानेवारी २०२६ सायं. ६ वाजता अंतिम यादी जाहीर केली जाणार आहे.
सोडतीचा दिवस, वेळ व स्थळ स्वतंत्रपणे संकेतस्थळावर जाहीर करण्यात येणार आहे.
उत्पन्न पुरावा अनिवार्य
अर्जदारांना १ एप्रिल २०२४ ते ३१ मार्च २०२५ या कालावधीतील उत्पन्नाचा पुरावा सादर करावा लागणार आहे. आयकर विवरणपत्र किंवा तहसीलदारांकडील उत्पन्न प्रमाणपत्र यापैकी एक कागदपत्र ग्राह्य राहील.
सोडतीच्या सर्व अटी–शर्ती, पात्रता, आरक्षण व अर्ज प्रक्रिया माहिती पुस्तिका स्वरूपात संकेतस्थळावर उपलब्ध करून देण्यात आली आहे.
या कार्यक्रमाला नाशिक मंडळाचे मुख्य अधिकारी शिवकुमार आवळकंठे, म्हाडाचे मुख्य अभियंता धीरजकुमार पंदीरकर तसेच अन्य अधिकारी उपस्थित होते.
