मुंबई, दि. ५ : मंगेश म्हात्रे
म्हाडा मुंबई मंडळाने १४९ दुकाने गाळ्यांच्या विक्रीसाठी होणाऱ्या ई-लिलावाकरिता नोंदणी व अर्ज सादर करण्याची अंतिम मुदत वाढवली आहे. इच्छुक अर्जदारांना आता १६ सप्टेंबर २०२५ रोजी रात्री ११.५९ वाजेपर्यंत नोंदणी, अर्ज सादर करणे, आवश्यक कागदपत्रे अपलोड करणे व अनामत रक्कम भरणे शक्य होणार आहे.
सुधारित वेळापत्रकानुसार, ई-लिलाव १८ सप्टेंबर रोजी सकाळी ११ वाजता सुरू होऊन सायंकाळी ५ वाजेपर्यंत पार पडेल. तर निकाल १९ सप्टेंबर रोजी सकाळी ११ वाजता जाहीर केला जाईल. निकाल https://eauction.mhada.gov.in
व https://mhada.gov.in
या संकेतस्थळांवर उपलब्ध होईल.
या लिलावात मुलुंड गव्हाणपाडा (६), कुर्ला-स्वदेशी मिल (५), तुंगा पवई (२), कोपरी पवई (२३), चारकोप (२३), जुने मागाठाणे बोरीवली (६), महावीर नगर कांदिवली (६), प्रतीक्षा नगर सायन (९), अँटॉप हिल वडाळा (३), मालवणी मालाड (४६), बिंबिसार नगर गोरेगाव (१७) तसेच शास्त्री नगर, सिद्धार्थ नगर, मजासवाडी-जोगेश्वरी येथे प्रत्येकी १ गाळा विक्रीसाठी उपलब्ध आहे.
लिलावात सहभागी होण्यासाठी अर्जदाराचे वय १८ वर्षांपेक्षा जास्त असणे आवश्यक आहे. तसेच महाराष्ट्रातील २०१८ नंतरचे अधिवास प्रमाणपत्र व विहित अनामत रक्कम भरणे बंधनकारक आहे.
पात्रता निकष, गाळ्यांचे तपशील, आरक्षण, अर्ज प्रक्रिया व सविस्तर अटी-शर्तींची माहिती https://eauction.mhada.gov.in
या संकेतस्थळावर उपलब्ध आहे. इच्छुकांनी सर्व माहिती काळजीपूर्वक वाचूनच अर्ज करावा, असे आवाहन म्हाडातर्फे करण्यात आले आहे.
