ठाणे, दि. २८ : ( अजय मगरे )
गणेशोत्सवाच्या जल्लोषात ठाणेकरांना उपमुख्यमंत्री एकनाथ शिंदे यांच्या संवेदनशील स्वभावाचा पुन्हा एकदा प्रत्यय आला. ( दि.२८) संध्याकाळी घोडबंदर रोडवर झालेल्या अपघातात जखमी झालेल्या तरुणाला शिंदे यांनी स्वतः पुढाकार घेऊन मदत केली.
किसननगर सार्वजनिक गणेशोत्सव मंडळात प्राणप्रतिष्ठा कार्यक्रमानंतर उपमुख्यमंत्री शिंदे शहरातील विविध मंडळांना भेट देत होते. यावेळी त्यांचा ताफा घोडबंदर रोडवर असताना, दुचाकी घसरून जखमी झालेला एक तरुण रस्त्याच्या कडेला बसलेला त्यांना दिसला.
क्षणाचाही विलंब न करता शिंदे यांनी ताफा थांबवून गाडीतून उतरून जखमीची विचारपूस केली. त्यानंतर तात्काळ ताफ्यातील अँब्युलन्स बोलावून त्या तरुणाला त्यात बसवले व जवळच्या होरायझन प्राईम रुग्णालयात दाखल केले. याचबरोबर उपचारावर लक्ष ठेवण्यासाठी आपल्या ताफ्यातील एका अधिकाऱ्यालाही रुग्णालयात सोबत पाठवले.
आज गणेशोत्सवाचा पहिला दिवस असल्याने घरोघरी ‘विघ्नहर्ता’ श्रीगणेशाचे आगमन झाले आहे. अशा वेळी जखमी तरुणाच्या मदतीला धावून जाऊन उपमुख्यमंत्री शिंदे स्वतःच या तरुणासाठी खरे ‘विघ्नहर्ता’ ठरले, अशी भावना नागरिकांनी व्यक्त केली.
