ठाणे, दि.२९ : अजय मगरे
मुंब्रा परिसरात ठाणे शहर गुन्हे शाखेच्या अंमली पदार्थ विरोधी पथकाने धडक कारवाई करत ड्रग्ज माफियांना मोठा झटका दिला आहे. पोलिसांनी तब्बल २ कोटी ३८ लाख ८७ हजार ९५० रुपयांचा मुद्देमाल जप्त केला आहे.
या कारवाईत २ किलो ३७४ ग्रॅम हायब्रीड गांजा (किंमत – २.३७ कोटी रुपये) व १९ MDMA / Ecstasy टॅबलेट्स (किंमत – १.४७ लाख रुपये) हस्तगत करण्यात आले.
ही कारवाई पोलीस आयुक्त ठाणे यांच्या आदेशानुसार विशेष मोहिमेअंतर्गत करण्यात आली. अपर पोलीस आयुक्त (गुन्हे) डॉ. पंजाबराव उगले व पोलीस उपआयुक्त (गुन्हे) अमरसिंह जाधव यांच्या मार्गदर्शनाखाली, वरिष्ठ पोलीस निरीक्षक राहुल मस्के यांच्या नेतृत्वाखाली सपोनि निलेश मोरे, सपोनि सोमनाथ कर्णवर पाटील, पोउपनि राजेंद्र निकम, पोउपनि दिपक डुम्मलवाड, पोहवा अमोल देसाई,अजय सकपाळ, शिल्पा कसबे, कोमल लादे यांच्यासह पथकाने ही यशस्वी कामगिरी केली.
२४ ऑगस्ट रोजी रात्री मुंब्रा बायपासवरील सिम्बायोसीरा शाळेजवळ सापळा रचून पोलिसांनी सुमित राजुराम कुमावत (२१, रा. बोरिवली, मुळ – राजस्थान) याला गजाआड केले. आरोपीकडून मिळालेला मुद्देमाल विक्रीसाठी ठेवण्यात आला होता. त्याच्याविरुद्ध एन.डी.पी.एस. कायद्यानुसार गुन्हा नोंदवला असून ४ सप्टेंबरपर्यंत तो पोलिस कोठडीत आहे.
तपासातून समोर आले आहे की जप्त हायब्रीड गांजा व MDMA टॅबलेट्स हे परदेशातून भारतात तस्करी करून आणले जातात. त्यामुळे या प्रकरणाचा आंतरराष्ट्रीय ड्रग्ज रॅकेटशी संबंध असल्याची शक्यता वर्तविण्यात येत असून पुढील तपास सुरू आहे.
