दावरवाडी, दि.१२. ( अभिजीत सोनवणे )
दावरवाडी गटातील आरोग्य सेवांची बिकट परिस्थिती लक्षात घेता प्राथमिक आरोग्य केंद्र, नांदर (ता. पैठण) येथील समस्यांबाबत संबंधित प्रशासनाचे लक्ष वेधण्यात आले आहे.
या आरोग्य केंद्रात मंजूर पदांच्या तुलनेत मोठ्या प्रमाणात रिक्त पदे असल्यामुळे नागरिकांना वेळेवर व दर्जेदार आरोग्य सेवा मिळण्यात अडथळे निर्माण होत आहेत. उपलब्ध माहितीनुसार, एकूण 21 पदांपैकी तब्बल 12 पदे रिक्त आहेत, ज्याचा थेट परिणाम रुग्णसेवेवर होत आहे.
या पार्श्वभूमीवर मा. मुख्य कार्यकारी अधिकारी व जिल्हा आरोग्य अधिकारी, जिल्हा परिषद छत्रपती संभाजीनगर यांच्याकडे निवेदन सादर करण्यात आले. निवेदनामध्ये सद्यस्थितीची सविस्तर माहिती देऊन रिक्त पदे तात्काळ भरण्याची मागणी करण्यात आली.
याच अनुषंगाने मा. मुख्य कार्यकारी अधिकारी श्रीमती पी. एम. मिन्नू मॅडम यांची प्रत्यक्ष भेट घेऊन त्यांना पुढील कार्यकाळासाठी शुभेच्छा देण्यात आल्या.
दावरवाडी गटातील प्रत्येक नागरिकाला सक्षम, दर्जेदार व वेळेवर आरोग्य सेवा मिळावी, यासाठी सातत्याने पाठपुरावा करण्यात येणार असल्याचे यावेळी सांगण्यात आले.
