दावरवाडी, दि.५.( प्रतिनिधी )
पोलिस पाटील संघटना महाराष्ट्र राज्य यांच्या वतीने पोलिस पाटलांच्या प्रलंबित मागण्यांसाठी नागपूर येथील हिवाळी अधिवेशनादरम्यान बुधवार, दि. १० डिसेंबर रोजी भव्य मोर्चाचे आयोजन करण्यात आले आहे. या मोर्चासाठी पैठण तालुक्यासह छत्रपती संभाजीनगर जिल्ह्यातील तसेच मराठवाडा आणि राज्यातील सर्व पोलिस पाटील व पदाधिकाऱ्यांनी मोठ्या संख्येने उपस्थित राहावे, असे आवाहन मराठवाडा अध्यक्ष अशोक चाबुकस्वार आणि जिल्हाध्यक्ष अशोक ठोंबरे यांनी केले आहे.
मोर्चाच्या तयारीसाठी पोलिस पाटील संघटनेची बैठक नुकतीच पैठण येथे पार पडली. या बैठकीत अनेक महत्त्वाच्या मागण्यांवर चर्चा झाली. त्यात प्रमुखतः—पोलिस पाटीलांचे वयोमर्यादा ६० वरून ६५ वर्षे करण्यात यावी
सेवानिवृत्तीनंतर एकरकमी १० लाख रुपये मानधन देण्यात यावे
पोलिस पाटील अधिनियम १९६७ मध्ये आवश्यक बदल करून त्याची काटेकोर अंमलबजावणी करावी
या मागण्यांसाठी हा मोर्चा काढण्यात येणार असल्याचे बैठकीत सांगण्यात आले.बैठकीस मराठवाडा अध्यक्ष अशोक चाबुकस्वार, जिल्हाध्यक्ष अशोक ठोंबरे, उपाध्यक्ष मानिक साळवे, पंडित मोरे, काकासाहेब पवार, कल्याणराव आगळे, एकनाथ काशिद, जनार्दन शिंदे, खामकर, रामेश्वर सोनवणे, विश्वनाथ मगरे, विठ्ठल झिणे, अर्जुन गहाळ, ईश्वर औटे, अशोक घाडगे, दत्तात्रय काकडे आदी पदाधिकारी उपस्थित होते.
