भक्कम पुरावे गोळा करून खटला फास्ट ट्रॅक कोर्टात चालवण्याचे उपमुख्यमंत्री शिंदे यांचे निर्देश…
मुंबई : अजय मगरे
भोर-नसरापूर येथे साडेतीन वर्षांच्या चिमुकलीवर पाशवी अत्याचार करून तिची निर्घृण हत्या करणाऱ्या नराधमाला फासावर चढवण्यासाठी पोलिसांनी भक्कम पुरावे गोळा करावेत, असे कठोर निर्देश राज्याचे उपमुख्यमंत्री एकनाथ शिंदे यांनी दिले आहेत. आरोपीविरोधातील खटला फास्ट ट्रॅक कोर्टात चालवून त्याला तातडीने फाशीची शिक्षा व्हावी, यासाठी शासन सर्वतोपरी प्रयत्न करेल, असेही त्यांनी स्पष्ट केले.
या अमानुष घटनेने पुणे जिल्हा हादरून गेला असून भोर आणि नसरापूर परिसरात संतप्त प्रतिक्रिया उमटत आहेत. संतप्त ग्रामस्थांनी पुणे-बंगळुरू महामार्गावर रास्ता रोको आंदोलन करत आरोपीला कठोर शिक्षा देण्याची मागणी केली.
दरम्यान, मुख्यमंत्री देवेंद्र फडणवीस यांनीही या घटनेची गंभीर दखल घेतली आहे. उपमुख्यमंत्री शिंदे यांनी पुणे ग्रामीणचे पोलीस अधीक्षक संदीप गिल यांच्याशी दूरध्वनीवरून संपर्क साधून तपासाचा आढावा घेतला. आरोपीने यापूर्वीही अशाच प्रकारचा गुन्हा केल्याची माहिती समोर आली असून अशा नराधमाला समाजात राहण्याचा अधिकार नसल्याचे शिंदे यांनी स्पष्ट केले.
आरोपीवर कठोर कलमांखाली गुन्हा दाखल करून त्याला फाशीची शिक्षा मिळावी, यासाठी तपास यंत्रणांनी सक्षम पुरावे सादर करावेत, असे निर्देश त्यांनी पोलिसांना दिले. तसेच पीडित चिमुकलीच्या कुटुंबाला न्याय मिळवून देण्यासाठी शासन कटिबद्ध असल्याचेही त्यांनी सांगितले.
