शिवाजी मंदिर नाट्यगृहात सोहळा; अभ्यासकांचा उत्स्फूर्त प्रतिसाद
मुंबई : अजय मगरे
महाड येथील ऐतिहासिक चवदार तळे सत्याग्रहाच्या शताब्दी वर्षानिमित्त “सत्याग्रह महाड चवदार तळ्याचा” या महत्त्वपूर्ण पुस्तकाचे प्रकाशन उत्साहात पार पडले. या पुस्तकाचे लेखक सत्याग्रहाचे प्रमुख संघटक कॉ. आर. बी. मोरे असून, हा दस्तावेज चळवळीचा खरा इतिहास जनतेसमोर मांडणारा असल्याचे मत मान्यवरांनी व्यक्त केले.
शिवाजी मंदिर नाट्यगृहात आयोजित प्रकाशन समारंभात दलित पँथरचे संस्थापक व आंबेडकरी चळवळीचे अभ्यासक ज. वि. पवार यांनी पुस्तकाचे महत्त्व अधोरेखित करताना सांगितले की, “या पुस्तकामुळे महाड सत्याग्रहाचा खरा इतिहास लोकांपर्यंत पोहोचेल.”
या वेळी आंबेडकरी चळवळीतील ज्येष्ठ कार्यकर्ते व संविधान अभ्यासक सुरेश सावंत यांनीही पुस्तकाचे कौतुक करताना नमूद केले की, “स्वतः सत्याग्रहातील महत्त्वाची भूमिका निभावणाऱ्या कॉ. आर. बी. मोरे यांनी हे पुस्तक लिहिल्याने त्याचे ऐतिहासिक महत्त्व अधिक वाढते. हे पुस्तक तळागाळातील कार्यकर्त्यांपर्यंत पोहोचणे आवश्यक आहे.”
कार्यक्रमात ज्येष्ठ स्त्रीवादी अभ्यासक डॉ. छाया दातार यांनीही या पुस्तकाचे वाचन प्रत्येकाने करावे, असे आवाहन केले. तसेच बोधी रंगभूमी चळवळीचे कार्यकर्ते व माजी नाट्य संमेलनाध्यक्ष प्रेमानंद गज्वी, नाटककार संदेश गायकवाड आणि प्रतिशब्द प्रकाशनाचे प्रमुख सुबोध मोरे यांचीही मंचावर उपस्थिती होती.
महाडच्या चवदार तळे सत्याग्रहाच्या शताब्दी वर्षाची सुरुवात मार्च महिन्यात झाली असून, त्यानिमित्ताने मुंबईतील “प्रतिशब्द” प्रकाशनातर्फे या कार्यक्रमाचे आयोजन करण्यात आले होते.
दरम्यान, कार्यक्रमात संघर्षमय सावित्री या संदेश गायकवाड लिखित-दिग्दर्शित व संध्या पानसकर अभिनित नाट्यप्रयोगाचे सादरीकरण करण्यात आले. या प्रयोगाला उपस्थित प्रेक्षकांनी उत्स्फूर्त प्रतिसाद दिला.
