कायम नोकरी, वेतनश्रेणीसह सामाजिक सुरक्षेची मागणी…
मुंबई : प्रतिनिधी
पोषण, शिक्षण आणि आरोग्य क्षेत्रातील महत्त्वाच्या शासकीय योजना राबवणाऱ्या हजारो योजना कर्मचाऱ्यांनी सोमवारी आझाद मैदानावर जोरदार आक्रोश ठिय्या आंदोलन करत आपल्या विविध प्रलंबित मागण्यांकडे शासनाचे लक्ष वेधले. सेंटर ऑफ इंडियन ट्रेड युनियन्स (सिटू) संलग्न योजना कर्मचारी समन्वय समितीच्या नेतृत्वाखाली हे आंदोलन सुरू झाले.
या आंदोलनात अंगणवाडी सेविका व मदतनीस, आशा स्वयंसेविका, गटप्रवर्तक, राष्ट्रीय आरोग्य अभियानातील कर्मचारी तसेच शालेय पोषण आहार कामगार मोठ्या संख्येने सहभागी झाले होते. या कर्मचाऱ्यांना कायमस्वरूपी शासकीय कर्मचारी म्हणून मान्यता द्यावी, वेतनश्रेणी लागू करावी आणि ईएसआयसी, भविष्यनिर्वाह निधी, ग्रॅच्युइटी व पेन्शनसारख्या सामाजिक सुरक्षा सुविधा द्याव्यात, अशी प्रमुख मागणी आंदोलकांनी केली.
सिटूच्या नेत्यांनी सांगितले की, एकात्मिक बालविकास सेवा योजना, राष्ट्रीय आरोग्य अभियान आणि मध्यान्ह भोजन योजना यांसारख्या महत्त्वाच्या योजना अनेक दशकांपासून सुरू असूनही शासन त्यांना अद्याप तात्पुरत्या योजना म्हणूनच वागणूक देत आहे. महिला व बालकांपर्यंत पोषण, आरोग्य आणि शिक्षणाच्या मूलभूत सेवा पोहोचविणारे कर्मचारी मात्र अल्प मानधनावर काम करत असल्याची खंत त्यांनी व्यक्त केली.
आंदोलनकर्त्यांनी राज्यातील सर्व कामगारांसाठी किमान ३० हजार रुपये मासिक वेतन, कंत्राटी कर्मचाऱ्यांचे नियमितीकरण, समान कामाला समान वेतन तसेच असंघटित कामगारांसाठी स्वतंत्र सामाजिक सुरक्षा मंडळे कार्यान्वित करण्याची मागणीही केली.
दरम्यान, आंदोलनाच्या पार्श्वभूमीवर महिला व बालविकास मंत्री अदिती तटकरे यांनी यापूर्वी संघटनेच्या प्रतिनिधींशी बैठक घेतली असून विविध मागण्यांवर चर्चा झाली आहे. राष्ट्रीय आरोग्य अभियानाच्या अधिकाऱ्यांनीही शिष्टमंडळाला चर्चेसाठी निमंत्रित केले आहे. मंगळवारी घरेलू कामगार, बांधकाम कामगार आणि बिडी कामगारांसह असंघटित क्षेत्रातील अन्य कामगारही या आंदोलनात सहभागी होणार असल्याची माहिती संघटनेने दिली.
या आंदोलनाला सिटूचे राज्य अध्यक्ष डॉ. डी. एल. कराड, राज्य सरचिटणीस एम. एच. शेख, अंगणवाडी कर्मचारी संघटनेच्या अध्यक्षा शुभा शमीम, आशा फेडरेशनच्या अध्यक्षा आनंदी अवघडे, शालेय पोषण आहार कामगार संघटनेचे अध्यक्ष प्रा. ए. बी. पाटील यांच्यासह विविध संघटनांच्या पदाधिकाऱ्यांनी मार्गदर्शन केले.
