गर्भवती पत्नीचा छळ केल्याचा आरोप; म्हाडा उपअभियंता वादाच्या भोवऱ्यात
मुंबई | प्रतिनिधी
सरकारी यंत्रणेतील अधिकाऱ्याविरोधातच घरगुती अत्याचाराची धक्कादायक तक्रार समोर आली आहे. म्हाडाच्या आर.आर. मंडळातील उपअभियंता अक्षय कोंढाळकर यांच्याविरोधात पत्नी चेतना यांनी शारीरिक व मानसिक छळ, हुंड्याची मागणी आणि अत्याचाराचे गंभीर आरोप करत पोलिसांत तक्रार दाखल केली आहे.
गर्भवती असताना मारहाणीचा आरोप
तक्रारीनुसार, पत्नी गर्भवती असतानाही पतीने तिचे डोके भिंतीवर आपटल्याचा धक्कादायक प्रकार घडला. “हे मूल माझेच आहे का?” असा संशय व्यक्त करत वारंवार मानसिक छळ करण्यात आल्याचेही तक्रारीत नमूद आहे. या प्रकारामुळे पत्नीला मोठा मानसिक धक्का बसल्याचा दावा करण्यात आला आहे.
दारूच्या नशेत मारहाण, पैशांसाठी दबाव?
अंधेरी येथील म्हाडा स्टाफ क्वार्टरमध्ये वास्तव्यास असताना पती दारूच्या नशेत वारंवार मारहाण करत असल्याचा आरोप आहे. मोबाईलची तपासणी करणे, फोन हॅक केल्याची धमकी देणे, आई-वडिलांशी बोलण्यास मनाई करणे असे प्रकार सातत्याने सुरू होते, असे तक्रारीत म्हटले आहे.
तसेच घर खरेदीसाठी माहेरहून १० ते १५ लाख रुपये आणण्याचा तगादा लावण्यात आला. अधिक रकमेची मागणी करत दबाव वाढवण्यात आल्याचाही आरोप करण्यात आला आहे.
पोलिस तपास सुरू
सदर प्रकरणी संबंधितांविरुद्ध कठोर कायदेशीर कारवाईची मागणी पत्नीने केली असून, या प्रकरणाचा पुढील तपास बोरिवली पोलीस करत आहेत.
