‘मिसिंग लिंक’ वर हायटेक सीसीटीव्हीची नजर, थेट कारवाईचा बडगा!
लोणावळा:मुंबई-पुणे द्रुतगती मार्गावरील बहुप्रतिक्षित ‘मिसिंग लिंक’ (कनेक्टिंग लिंक) सुरू होताच पर्यटकांची आणि वाहनचालकांची मोठी गर्दी पाहायला मिळत आहे. मात्र, या निसर्गरम्य मार्गावर गाडी थांबवून ‘सेल्फी’ काढण्याचा किंवा ‘रील’ बनवण्याचा मोह आता तुमच्या खिशाला मोठी कात्री लावणार आहे. प्रशासनाने स्पष्ट इशारा दिला आहे की, “एक सेल्फी थेट जेलची हवा किंवा मोठा दंड”देऊ शकते.
बोगद्यात ‘स्टंटबाजी’ कराल तर गाठ पोलिसांशी!
मिसिंग लिंकवरील केबल स्टेड ब्रिज आणि भव्य बोगदे पाहण्यासाठी वाहनचालक चक्क रस्त्याच्या मध्यभागी किंवा पुलावर गाड्या थांबवत असल्याचे समोर आले आहे. ही बाब अत्यंत धोकादायक असून यामुळे भीषण अपघाताची टाळ टांगती आहे. महाराष्ट्र राज्य रस्ते विकास महामंडळाने (MSRDC) याची गंभीर दखल घेतली असून, आता अशा ‘हौशी’ प्रवाशांवर महामार्ग पोलिसांचा तिसरा डोळा नजर ठेवून आहे.
२४ तास ‘CCTV’ ची नजर
प्रवाशांच्या सुरक्षिततेसाठी आणि वाहतूक कोंडी टाळण्यासाठी कनेक्टिंग लिंक प्रकल्पातील सर्व बोगदे आणि पुलांवर २४ तास सीसीटीव्ही (CCTV) कॅमेरे बसवण्यात आले आहेत. अत्याधुनिक तंत्रज्ञानाद्वारे प्रत्येक हालचालीवर नियंत्रण कक्षातून लक्ष ठेवले जात आहे. त्यामुळे कुठेही गाडी थांबवून निसर्गसौंदर्य टिपण्याचा किंवा सेल्फी काढण्याचा प्रयत्न केल्यास, तत्काळ दंडाची पावती फाडली जाणार आहे.
वेगमर्यादेचे नियम लागू
वाहतूक विभागाने अपघातांचे प्रमाण कमी करण्यासाठी विविध वाहनांसाठी सुधारित वेगमर्यादा देखील जाहीर केली आहे:
• हलकी वाहने (कार): जास्तीत जास्त १०० किमी/ताशी.
• बस व जड प्रवासी वाहने: जास्तीत जास्त ८० किमी/ताशी.
प्रशासनाचा ‘रुद्र’ अवतार:
“सेल्फी, फोटो आणि रिल्स काढण्यासाठी मिसिंग लिंकच्या महामार्गावर थांबणे हा गुन्हा ठरणार आहे. तुमच्या एका बेजबाबदार कृत्यामुळे इतरांचा जीव धोक्यात येऊ शकतो,” अशा कडक शब्दांत प्रशासनाने प्रवाशांना सुनावले आहे. आता केवळ समज दिली जाणार नाही, तर मोठ्या दंडाची आकारणी केली जाईल.
