सध्या सोशल मीडियावर एक मेसेज व्हायरल होत आहे की, जनगणनेत इतर भाषांची माहिती दिल्यास मराठी भाषिकांची संख्या कमी होईल. हे पूर्णपणे असत्य आहे.
जनगणना २०२७च्या पार्श्वभूमीवर सोशल मीडियावर मराठी भाषेबाबत मोठ्या प्रमाणात व्हायरल होत असलेला संदेश दिशाभूल करणारा आणि खोटा असल्याचे स्पष्ट झाले आहे. नागरिकांनी अशा अप्रमाणित माहितीवर विश्वास ठेवू नये, असे आवाहन प्रशासनाकडून करण्यात आले आहे.
सध्या सोशल मीडियावर मराठी भाषेबाबत विविध दावे आणि अफवा पसरवल्या जात असून त्यामुळे संभ्रमाचे वातावरण निर्माण झाले आहे. मात्र, जनगणनेसंदर्भातील कोणतीही अधिकृत माहिती फक्त सरकारी संकेतस्थळांवरच उपलब्ध होणार असल्याचे स्पष्ट करण्यात आले आहे.
जनगणनेसंदर्भात अधिकृत आणि वस्तुनिष्ठ माहितीसाठी https://censusindia.gov.in आणि https://se.census.gov.in या संकेतस्थळाला भेट द्यावी.
अफवा आणि चुकीच्या माहितीमुळे समाजात संभ्रम निर्माण होऊ शकतो. त्यामुळे कोणतीही माहिती शेअर करण्यापूर्वी तिची खातरजमा करणे आवश्यक असल्याचेही प्रशासनाने स्पष्ट केले आहे.
