महिला आयोगाच्या अध्यक्षपदाबाबत ‘मीरा बोरवणकर’ नियुक्तीची बातमी खोटी; सरकारची स्पष्ट भूमिका
मुंबई : महाराष्ट्र राज्य महिला आयोगाच्या अध्यक्षपदी माजी आयपीएस अधिकारी मीरा बोरवणकर यांची नियुक्ती झाल्याच्या बातम्या पूर्णपणे खोट्या आणि दिशाभूल करणाऱ्या असल्याचं महाराष्ट्र शासनाने स्पष्ट केलं आहे. सध्या या नियुक्तीबाबत कोणताही अधिकृत निर्णय झालेला नसल्याची माहिती देत सोशल मीडियावर व्हायरल होत असलेल्या दाव्यांवर विश्वास ठेवू नये, असं आवाहन करण्यात आलं आहे.
दरम्यान, राष्ट्रवादी काँग्रेसचे आमदार रोहित पवार यांनी यापूर्वी मीरा बोरवणकर यांच्या नावाची महिला आयोगाच्या अध्यक्षपदासाठी शिफारस केली होती. महिलांचे हक्क, सुरक्षा आणि प्रतिष्ठा यासाठी महिला आयोग महत्त्वाची भूमिका बजावू शकतो, असे मत त्यांनी व्यक्त केले होते.
रोहित पवार यांनी यासोबतच निवृत्त आयएएस अधिकारी मेधा गाडगीळ, सामाजिक कार्यकर्त्या वर्षा देशपांडे आणि मनीषा गुप्ते यांसारख्या अनुभवी व्यक्तींनाही या पदासाठी संधी द्यावी, अशी मागणी केली होती.
