रुग्णांना एका विशिष्ट मेडिकलमधूनच औषधे घेण्याची सक्ती उघड; प्रिस्क्रिप्शनची प्रतही न दिल्याचा आरोप
नागपूर : प्रतिनिधी
नागपूरमधील न्यू एरा हॉस्पिटलमध्ये औषध विक्रीच्या नियमांचे गंभीर उल्लंघन झाल्याचा धक्कादायक प्रकार अन्न व औषध प्रशासनाच्या (एफडीए) कारवाईत उघड झाला आहे. हॉस्पिटलच्या तळघरात कोणताही वैध परवाना नसताना विक्रीसाठी साठवून ठेवलेला तब्बल २० लाख १५ हजार २९० रुपयांचा औषधसाठा एफडीएने जप्त केला असून संबंधितांविरुद्ध औषधे व प्रसाधने अधिनियम, १९४० अंतर्गत पुढील कायदेशीर कारवाई सुरू करण्यात आली आहे.
गोपनीय माहितीच्या आधारे एफडीएच्या नागपूर पथकाने २७ जून रोजी लकडगंज येथील न्यू एरा हॉस्पिटलशी संलग्न मेडिकल स्टोअरची तपासणी केली. औषधसाठ्याच्या पडताळणीत मोठी तफावत आढळल्यानंतर हॉस्पिटलच्या तळघरातील एका खोलीत मोठ्या प्रमाणात परवान्याशिवाय औषधे विक्रीसाठी साठवून ठेवण्यात आल्याचे समोर आले. संबंधितांकडे औषध विक्रीचा परवाना तसेच खरेदी-विक्रीची आवश्यक कागदपत्रे नसल्याने एफडीएने संपूर्ण साठा जप्त केला.
तपासादरम्यान आणखी एक गंभीर बाब उघडकीस आली. रुग्णालयातील संगणक प्रणालीद्वारे थेट मेडिकल स्टोअरला औषधांची ऑर्डर पाठवून रुग्ण व त्यांच्या नातेवाईकांना त्याच दुकानातून औषधे खरेदी करण्यास भाग पाडले जात असल्याचे आढळले. तसेच डॉक्टरांनी लिहून दिलेल्या प्रिस्क्रिप्शनची प्रतही रुग्णांना दिली जात नसल्याचे निदर्शनास आले.
विशेष म्हणजे, १२ जून २०२६ रोजी एफडीए आयुक्त तुकाराम मुंढे यांनी रुग्णांना विशिष्ट मेडिकलमधून औषधे घेण्यास सक्ती करू नये, असे स्पष्ट आदेश दिले होते. मात्र न्यू एरा हॉस्पिटलमध्ये या आदेशाचे उल्लंघन झाल्याचे तपासात स्पष्ट झाले. आवश्यक सूचना फलकही रुग्णालयात लावण्यात आलेला नव्हता.
याशिवाय मेडिकल स्टोअरमध्ये केमिस्ट अँड ड्रगिस्टचा नामफलक नसणे, कालबाह्य औषधांची स्वतंत्र व्यवस्था नसणे, शेड्युल एच-१ औषधांच्या नोंदीत तफावत आणि निरीक्षण पुस्तिका उपलब्ध नसणे असे अनेक गंभीर नियमभंगही एफडीएच्या निदर्शनास आले. संबंधितांना कारणे दाखवा नोटीस बजावण्यात आली असून पुढील कायदेशीर कारवाईचा प्रस्ताव देण्यात आला आहे.
दरम्यान, रुग्णांना औषधे कोणत्याही अधिकृत मेडिकलमधून खरेदी करण्याचा पूर्ण अधिकार आहे. कोणतेही हॉस्पिटल किंवा मेडिकल जबरदस्ती करत असल्यास नागरिकांनी तात्काळ एफडीए कार्यालयाशी किंवा टोल-फ्री क्रमांक १८००२२२३६५ वर तक्रार नोंदवावी, असे आवाहन एफडीए आयुक्त तुकाराम मुंढे यांनी केले आहे.
