शरद पवार गटाचा महायुतीला पाठिंबा; महापौर निवडणुकीआधी समीकरणे बदलली
मुंबई : मंगेश म्हात्रे
मुंबईच्या राजकारणात मोठी घडामोड झाली आहे. मनसे आणि उद्धव ठाकरे यांच्या शिवसेनेसोबत निवडणूक लढणाऱ्या शरद पवार गटाच्या राष्ट्रवादी काँग्रेसने अचानक महायुतीला पाठिंबा दिल्याने महापालिकेतील पक्षीय गणित बदलण्याची चिन्हे दिसू लागली आहेत.
मुंबईतील राष्ट्रवादी (शरद पवार गट)चे एकमेव नगरसेवक अजित रावराणे यांनी महायुतीला समर्थन जाहीर केल्याने सत्तासमीकरणांवर थेट परिणाम होणार आहे. महापौर निवडणुकीपूर्वी झालेल्या या निर्णयामुळे राजकीय वर्तुळात चर्चांना उधाण आले असून, पुढील रणनीती काय असणार याकडे सर्वांचे लक्ष लागले आहे.
कोण आहेत अजित रावराणे?
अजित रावराणे हे राष्ट्रवादी काँग्रेसच्या शरद पवार गटाचे नगरसेवक आहेत. दिंडोशी विधानसभा क्षेत्रातील वार्ड क्रमांक 43 मधून त्यांनी विजय मिळवला होता. या निवडणुकीत त्यांना 11,760 मते मिळाली होती. त्यांनी भाजपचे उमेदवार विनोद उदयनारायण मिश्रा यांचा 495 मतांनी पराभव करत महापालिकेत प्रवेश केला होता.
या नव्या राजकीय घडामोडीमुळे महापालिकेतील सत्ता समीकरणे पुन्हा एकदा बदलण्याची शक्यता निर्माण झाली आहे. महापौर निवडणुकीत याचा नेमका फायदा कोणाला होणार आणि पुढील राजकीय डावपेच कसे रचले जाणार, याबाबत उत्सुकता वाढली आहे.
