मुंबई महापालिकेत सायन-कोळीवाड्याचं वर्चस्व!
मुंबई: मुंबई महानगरपालिकेतील मिनी मंत्रालय समजल्या जाणाऱ्या विविध समित्यांच्या भाजपने आपल्या शिलेदारांना ताकद देण्यास सुरुवात केली असून, सायन-कोळीवाडा विधानसभा क्षेत्राचे वर्चस्व महापालिकेत स्पष्टपणे दिसून येत आहे.
वॉर्ड क्रमांक १७३ च्या भाजप नगरसेविका शिल्पा दत्ताराम केळुसकर यांची महापालिकेच्या अत्यंत महत्त्वाच्या मानल्या जाणाऱ्या स्थापत्य समिती (शहर) आणि महिला व बाल कल्याण समिती सदस्यपदी निवड झाली आहे. शहराच्या विकासकामात महत्त्वाची भूमिका असलेल्या स्थापत्य समितीत आणि महिलांच्या प्रश्नांना वाचा फोडणाऱ्या बाल कल्याण समितीत केळुसकर यांची वर्णी लागली आहे.
राजेश्री शिरवडकर ‘शिक्षण समिती’; तृष्णा विश्वासरावांना ‘बेस्ट’ संधी
दरम्यान, सायन कोळीवाडा विधानसभा क्षेत्रातून वार्ड क्रमांक 172 च्या भाजप नगरसेविका राजेश्री शिरवडकर यांची मुंबई महापालिकेच्या शिक्षण समितीच्या अध्यक्षपदी निवड झाली आहे. तसेच, शिवसेना (शिंदे गट) वार्ड क्रमांक 180 च्या नगरसेविका तृष्णा विश्वासराव यांची बेस्ट समिती सदस्यपदी निवड झाली आहे.
सायन-कोळीवाड्याला ‘झुकते माप’
या नियुक्त्यांकडे बारकाईने पाहिल्यास मुंबई महापालिकेत सायन-कोळीवाडा विधानसभा क्षेत्राचा दबदबा वाढल्याचे स्पष्ट होत आहे. शिक्षण, बेस्ट आणि स्थापत्य यांसारख्या तिन्ही महत्त्वाच्या विभाग एकाच विधानसभा क्षेत्रातील नगरसेविकांच्या हाती गेल्याने राजकीय वर्तुळात याचीच चर्चा रंगली आहे.
