मुंबई, दि. ४ : मंगेश म्हात्रे
म्हाडा नाशिक गृहनिर्माण व क्षेत्रविकास मंडळातर्फे २० टक्के सर्वसमावेशक गृहनिर्माण योजनेअंतर्गत एकूण ४७८ सदनिकांच्या विक्रीसाठी सोडत प्रक्रिया सुरू करण्यात आली आहे. ऑनलाईन अर्ज नोंदणी व अर्ज भरणा प्रक्रियेचा शुभारंभ म्हाडाचे उपाध्यक्ष संजीव जयस्वाल यांच्या हस्ते ‘गो-लाईव्ह’ कार्यक्रमातून झाला.
गंगापूर, देवळाली, पाथर्डी, म्हसरुळ, नाशिक व आगर टाकळी शिवार येथील विविध प्रकल्पांतील सदनिकांचा या सोडतीत समावेश आहे. सर्व सदनिका अल्प उत्पन्न गटातील अर्जदारांसाठी उपलब्ध आहेत.
या सोडतीसाठी ऑनलाईन अर्ज नोंदणी व भरणा ४ सप्टेंबरपासून ३ ऑक्टोबर २०२५ पर्यंत करता येणार असून, अनामत रकमेचा भरणा ४ ऑक्टोबरपर्यंत RTGS/NEFT द्वारे करता येईल. स्वीकृत अर्जांची अंतिम यादी १७ ऑक्टोबर रोजी म्हाडाच्या संकेतस्थळावर प्रसिद्ध होणार आहे.
जयस्वाल यांनी अर्जदारांना https://housing.mhada.gov.in
या अधिकृत संकेतस्थळावरून किंवा म्हाडा लॉटरी ॲपद्वारेच अर्ज करण्याचे आवाहन केले. “म्हाडाच्या संगणकीय सोडत प्रणालीत मानवी हस्तक्षेपास वाव नसून, प्रक्रिया पारदर्शक व सुलभ आहे,” असे ते म्हणाले.
यापूर्वी नाशिक मंडळाने ३७९ सदनिका, १०५ दुकाने व ३२ भूखंडांचे यशस्वी वितरण केले असल्याची माहितीही यावेळी देण्यात आली.
